Fer ekki fet um vitlausramannahelgina!

 

 

 

 

 

 

 

 

Ég fer ekki fet, svo mikið er víst, þessa helgi. Fríða Feykirófa, sefur hér með kollinn sinn tylltan upp á hendinni og hristist á meðan ég pikka inn þessa færslu. Hún vill bara lúlla hjá mér. Eltir mig á röndum og vill fá að komast í fangið mitt. Sofa bara og sofa. Mér finnst hún ekki borða nóg, er að reyna að koma næringu ofan í hana, og finnst ekki nóg að hafa þyngst um 30 gr. síðan hún kom til okkar. Hún er ekki nema rétt rúmt kíló, en hún borðar samt eitthvað, drekkur líka og pissar og kúkar, oftast úti. 

Ég reyndi að fara með hana til dýralæknis í gær, til að athuga með dömuna, en doksi var lasin og ekki við. Ég veit að ég er kannski einum of stressuð. Það er ekkert að, hún er ekki veik. Hún er bara svo lítil að það þarf svo lítið til með svona lítinn kropp. Ég er þó minna stressuð í dag, en í gær og er viss um að þetta fer allt að koma bara. Hún er hress Feykirófan, finnst voða gaman að eltast við Afríku og er ekki hrædd við hina hundana. Þær eru allar mjög góðar við hana og alveg til í að leika. Chiquitu finnst voða gaman að fá hana í eltingarleik og reipitog og stríðir henni með bangsanum hennar. 

Við fjölskyldan förum ekki neitt þessa helgi, erum ekki vön því og Verslunarmannahelgin er oft kölluð "vitlausramannahelgin" hér á bæ. Okkur finnst ekkert spennandi að vera í útilegu á útihátíð, innan um fólk sem er ýmist ofurölvi eða á hinum ýmsu stigum áfengisneyslu. Ég er ekki til í að gefa börnum mínum þau skilaboð að slíkt sé í góðu lagi. Svo finnst mér svo öfugsnúið að verslunarfólk fær fæst frí, akkúrat þessa helgi. Ég hélt að þessir frídagar væru fyrir það, ekki alla hina. En svona er þetta. Við höfum skapað hefð fyrir því að leigja myndir þessa helgi og halda okkar árlegu vídeósukkhelgi, heima í faðmi fjölskyldunnar. Kannski skrepp ég á leiguna á eftir, ef ég nenni.

Já, ég held að ég sé bara orðin boring og leiðinleg í ellinni, svei mér þá. Að vísu dettur mínum strákum ekki í hug að biðja um að fara á útihátíð þessa helgi. Mér finnst ég hafa sloppið ótrúlega vel í gegn um tíðina með það.

Ég vona að þið hafið það sem best kæru vinir. Njótið ykkar og haldið heilsu.

Góða skemmtun....

Athugasemdir

[Ásdís Sigurðardóttir, 1.8.2008 kl. 21:49]

Þetta er ekki helgi til að ferðast að mínu mati.  Yndisleg litla skottan, langar að knúsa hana, vona að allt verði í lagi.  Kær kveðja elskan   

[Guðrún B. (IP-tala skráð) 2.8.2008 kl. 00:11]

Það er engin vitlausramannahelgi í Klettaborg.

Som better fer.

[Gísli Bergsveinn Ívarsson, 2.8.2008 kl. 01:38]

Undir flestum kringumstæðum hefði ég farið í útilegu þessa helgi en þar sem við erum að fara erlendis næstu helgi þá var ákveðið að fara ekki, enda þarf ég að undirbúa mig fyrir smá skoðun á sunnudag og mánudag.

[Nína Margrét Perry (IP-tala skráð) 7.8.2008 kl. 14:09]

Lang best að vera heima um "vitlausramannahelgina". Við fórum á sunnudeginum á sýninguna Diskó/Pönk í Árbæjarsafninu með 5 börn og þeim fannst hún bæði skemmtileg, skrýtin og stórmerkileg!  Stelpunum fannst gamla diskógólfið úr Hollywood skemmtistaðnum æðislegt og vildu að svona gólf væri í skólanum þeirra. Svo vorum við með matarboð um kvöldið með góðum gestum.

Litla Fríða Feykirófa er alveg eins og Gismó úr Gremlins á myndinni, algjört æði  enda var hann líka algjört krútt. Hafið það sem allra best.

Kær kveðja úr Grafarvoginum.

[Margrét Össurardóttir (IP-tala skráð) 7.8.2008 kl. 22:35]

Ellimanna hvað,,,,, ert farin að tala um ellina strax????? Baddý,,,,,, taktu þig á !!!!