Eiturgræn Nornasúpa....glútenfrí, fitusnauð og algjört sælgæti!

Ég varð bara að skíra þessa súpu eitthvað svona, hún er svo svakalega græn á litinn að litlir, stoltir, grænmetisræktendur verða að fá á tilfinninguna að súpan úr grænmetinu þeirra er algjört dúndur og leyndarmál skoh....

En litli sjálfstæðismaðurinn minn kom heim úr skólagörðunum með fyrstu sendinguna úr reitnum sínum áðan. Hann var stoltur þegar hann færði mömmu sinni tvö brokkólí búnt og fjögur stór grænkálsblöð. Ég varð að skella þessu í pott í hvelli!

En í súpuna fór eftirfarandi:

1,5 l vatn (ca)

2 súputeningar, ég notaði kjúklinga en grænmetisteningar eru í fínu lagi líka

2 afhýddar kartöflur, skornar í teninga (til að þykkja súpuna)

2 brokkóli hausar (eitt stórt búnt úr búðinni er líka nóg)

2 væn grænkálsblöð, rifin niður.

Ferskt kóríander skorið smátt, stönglarnir með, smá chilipipar, sítrónupipar, hvítlaukssalt og Maldon salt. Allt eftir smekk. 

 

Ég lét vatnið með teningunum ná suðu, setti kartöflurnar út í og leyfði þeim að malla í smástund. Svo skellti ég brokkólíinu og grænkálinu út í, leyfði því að krauma örstutt og notaði svo töfrasprota til að mixa þessu í mauk. Kóríander og kryddin ráku lestina og súpan er þvílíkt sælgæti að það hálfa væri hellingur. 

Liturinn er bara svo eiturgrænn að það er hægt að segja hvað sem er um þessa súpu. Litla manninum fannst mest spennandi þegar ég sagði að þetta væri sko Nornasúpan góða, innihaldið væri leyndarmál, (fyrir utan grænmetið hans) en hann fengi ofurkrafta ef hann borðaði vel af þessari súpu. Vini hans leist að vísu ekkert á blikuna og neitaði að smakka, ég skil ekki afhverju??  Sérstaklega þegar ég sagði að tennurnar þeirra yrðu loðnar og krullaðar við neyslu þessarar súpu og að þeir fengu ofurkrafta. Nei, nei, svo smakkaði hann líka og fannst hún bara góð þrátt fyrir allt.

Jæja, best að fara að gera eitthvað, þarf að skreppa í bæinn að hundastússast eitthvað smá. Hafið það gott í dag.                                                            

 

Athugasemdir

[Ásdís Sigurðardóttir, 28.7.2008 kl. 12:27]

Takk fyrir uppskriftina en ég nenni ekki að elda hana, þú mátt bjóða mér í mat.

[Guðrún B. (IP-tala skráð) 28.7.2008 kl. 17:01]

Allt er vænt sem vel er grænt.. hehe

[Nína Margrét (IP-tala skráð) 29.7.2008 kl. 11:24]

Hæ

Hey, vá, bara búin að breyta síðunni? Mér brá, maður er svo vanur hinni en þessi er mjög fín. Það vantar samt fullt inná hana eins og alla bloggvini þína. Gangi þér vel með breytingarnar.

Súpan hljómar ansi spennandi og græn, maður ætti að prufa hana fljótlega.  Litli sjálfstæðismaðurinn þinn er greinilega mjög duglegur í skólagörðunum, frábært.

Kær kveðja úr Grafarvoginum

[Margrét Össurardóttir (IP-tala skráð) 29.7.2008 kl. 17:54]

namminamm   hefði verið til í smá smakk

[Huld S. Ringsted, 29.7.2008 kl. 23:37]

Girnilegasta súpa greinilega, liturinn er svo algjört aukaatriði

[Guðrún B. (IP-tala skráð) 30.7.2008 kl. 15:06]

Hurru mín kæra, ertu til í að laga síðuna þína,  maður verður bara feiminn hérna inni sko ..

[Nína Margrét Perry (IP-tala skráð) 31.7.2008 kl. 10:51]

Sammála síðasta ræðumanni.

Kv, Grafarvogur.

[Bjarndís Helena Mitchell, 31.7.2008 kl. 11:15]

Er að reyna að laga, vonandi tekst það.

[Guðrún B. (IP-tala skráð) 1.8.2008 kl. 12:51]

Úfff... sem betur fer ertu komin aftur, mín síða aftur á móti er glötuð, þannig að ég fékk nýtt lúkk.  En sko .. maður er svo vanafastur sjáðu til...  knús á þig og takk fyrir hjálpina í gær.